1 Samuel 12
1 撒母耳對所有个以色列人講：「𠊎已經照你等个要求立王治理你等。
2 這下，你等有王好帶領你等。𠊎已經恁老、頭那毛白囉，𠊎个孻仔全部在你等當中。𠊎後生到這下，一直帶領你等。
3 這下，𠊎在這位；若係𠊎做過麼介毋著个事，你等做得在上主㧯佢膏油立个王面前告𠊎。𠊎搶過人个牛抑係驢仔麼？𠊎識欺騙抑係壓制麼人麼？𠊎識被麼人收買麼？若係𠊎做過這種事，𠊎一定愛賠。」
4 民眾應講：「你毋識欺騙𠊎等抑毋識壓制𠊎等；你毋識對麼人拿無應該拿个東西。」
5 撒母耳對佢等講：「今晡日，上主㧯佢膏油立个王係𠊎个證人；你等知𠊎係清白个。」民眾講：「無毋著！上主做得為𠊎等做證。」
6 撒母耳繼續對人民講：「實在係上主揀選摩西㧯亞倫，佢又帶領你等个祖先出埃及。
7 這下，你等愛企好！𠊎在上主面前愛警告你等：上主為到救你等㧯你等个祖先行恁多公義个大事。
8 雅各全家到埃及去，後來埃及人欺負佢等个時，你等个祖先向上主求喊。上主就派摩西㧯亞倫帶領佢等出埃及，將佢等安頓在這所在。
9 「無想到佢等卻毋記得上主—佢等个上帝。所以，上主俾非利士人、摩押王㧯夏瑣城个將軍西西拉攻打你等个祖先，征服佢等。
10 所以佢等向上主求喊講：『上主啊！𠊎等有罪了；因為𠊎等悖逆你，去拜該兜巴力㧯亞斯她錄。這下求你救𠊎等離開仇敵！𠊎等一定會敬拜你！』
11 上主就派基甸、巴拉㧯耶弗他，最尾派𠊎來救你等脫離四周圍个仇敵，使你等平安過日。
12 總係你等看到亞捫人个王拿轄攻擊你等，就拒絕上主—你等个上帝做你等个王，要求𠊎講：『𠊎等一定愛有王來治理𠊎等。』
13 「這下，你等所選个王在這位。你等愛一個王；看哪，上主已經給你等了。
14 你等若敬畏上主—你等个上帝，事奉佢，聽從佢，遵守佢个誡命，你等㧯你等个王若對佢忠誠，你等就會平安無事。
15 總係，你等若毋聽從上主，毋遵守佢个誡命，佢就會攻擊你等，像頭擺攻擊你等个祖先共樣。
16 這下，你等企好！你等會看到上主愛做个大事。
17 這下敢毋係收割、毋會落雨个時期？總係𠊎愛祈求上主，佢就會打雷公、落雨。你等看到就知，你等向上主討愛立王係犯大罪。」
18 所以，撒母耳祈求上主；該日，上主就打雷公、落雨。人民全部盡驚上主㧯撒母耳；
19 佢等對撒母耳講：「請為僕人向上主—你个上帝祈禱，免得𠊎等死掉。這下𠊎等知，𠊎等討愛立王係罪上加罪。」
20 撒母耳應講：「毋使驚！雖然你等做這壞事，總係做毋得離開上主，反轉愛專心事奉佢。
21 你等毋好離開上主去跈該兜假神，它兜毋會幫助你等、救你等，因為它兜係假个。
22 上主因為佢自家个聖名，絕對毋會豁掉你等，因為佢歡喜選你等做佢自家个子民。
23 論到𠊎，上主愛𠊎一直為你等祈禱，恁樣𠊎正毋會再得罪佢。𠊎會教你等樣般做好事行正路。
24 愛敬畏上主，誠心誠意事奉佢；愛記得佢為你等做過个大事。
25 若係你等一直緊犯罪，你等㧯你等个王就會滅亡。」